BlogVrian

Boiraghyn y Phaggad Bree

2010-12-16T04:33:00.000-08:00

Ta mee litçheragh agglagh as mee screeu bloggyn. She yn Paggad Bree ta boirey orrym ec y traa t'ayn. Shenn spoyrt Manninagh, ceau keck er y Phaggad. Mennick dy liooar, v'eh resoonagh dy liooar dy cheau keck er y cholught shoh. Agh, harrish ny bleeantyn, veagh drogh ourys çheet orrym ny keayrtyn dy row Manninee gaccan mychione y Phaggad er yn oyr dy nee colught Manninagh v'ayn (y syndroym, 'T'ad jannoo reddyn foddey ny share across.')

Va'n mantra 'Ta feme er co-hirrey' ry chlashtyn. Haink co-hirrey rish ayns cummey Manx Line as va boggey mooar ayn - gys v'eh baghtal dy beagh Manx Line chammah as y Paggad brisht argid. Cha row lught as troailtee dy liooar ayn dy chummal seose daa cholught. As s'treih yn red eh nagh ren olteynyn jeh Tinvaal pohlldal Çhalse y Kerruish tra hug eh treealtys roish dy ashoonaghey yn Paggad.

S'feer eh dy vel monopolaghtyn ennagh ymmyrçhagh ayns Mannin.

Meoiryn-shee fo oardagh?

2010-05-31T09:04:00.000-07:00

Roish y Nollick 2009, va kuse dy fograghyn slaait ny screebit er raaidyn as boallaghyn ayns Mannin, y chooid smoo jeu mygeayrt Purt ny h-Inshey, ta mee credjal. Va 'Mannin Aboo' ry akin, agh, chammah as shen, ny h-enmyn jeh cheeraghyn v'ayns yn Impiraght Ghoaldagh keayrt dy row, marish y vlein daag ny Goaldee yn cheer (Va daayt ny ghaa aggairagh). Ayns cheeraghyn elley, veagh y lheid coontit dy ve jeh beggan scansh. Farbagh, foddee, agh cha nee cooish vooar leeidagh gys musthaa as aggle. Agh ren meoiryn-shee Vannin gaghtey myr dy beagh jerrey yn teihll cheet. V'eh jeeaghyn dy row ad dellal rish y chooish myr ayrn jeh'n Chaggey noi Ymagglaghey. V'ad loayrt mychione 'Y Troddan Ashooneyragh'.

Lurg tammylt, va skeeal ny ghaa ayns pabyr-naight as er y radio dy row cassid jeant er kuse dy leih aegey kyndagh rish jeeyl kimmeeagh. Agh eisht ren shin clashtyn skeealyn veih sleih ennagh dy row ny meoiryn-shee gaghtey er aghtyn scammyltagh. Skeeal dy daink ram meoiryn-shee gys y thie jeh guilley-scoill as ad coamrit ayns jaggadyn-flak as dy ren ad cur lhieu yn guilley gys stashoon meoir-shee er aght baggyrtagh. Skeealyn dy row co-earrooderyn as chellvaneyn shooylagh goit veih sleih ec ny meoiryn-shee as currit gys Sostyn cour scrutaghey! Row peiagh ennagh goardaghey shoh? Y skeeal smessey - va glish-laue currit er dooinney va slane oney, red ren jeeyl da'n claynt echey. Ta ny meoiryn-shee gra dy nee 'normal procedures' v'ayn. My s'feer shen, ta reddyn gaueagh baggyrt er pobble Vannin.

Grammeydys y Ghaelg

2009-01-24T10:20:00.000-08:00

Lhisagh y title ve 'Grammeydys ny Gaelgey'? Dy firrinagh, cha nel y gienneydagh jeh 'Gaelg'/'Gailck' ry gheddyn ayns stoo va screeut ayns ny eashyn hie shaghey. Er lhiam dy daink 'Gaelgey' rish tra screeu yn Arrymagh Robert Thomson 'Dy bishee ad tushtey ny Gaelgey!' ec jerrey yn roïe-raa tra ren eh 'First Lessons in Manx' liorish Goodwin ass y noa sy vlein 1965. Yn oyr dy vel mee screeu mychione y chooish shoh, shen dy vel tooilley sleih screeu ayns Gaelg nish (booise da Jee) as paart jeu gaavioghey reddyn sy Ghaelg hie magh ass çhengey yn theay foddey er dy henney. Er aght ennagh, ta shoh ny red feer vie. Er aght elley, shegin dooin ve kiarailagh nagh jeanmayd croo stoo sy ghrammeydys nagh row rieau ayn.

Ta treealtys er ny chur roish nish dy reaghey çhaglymyn dy resooney cooishyn grammeydys sy Ghaelg - treealtys feer vie. Cha nel caaghyn dy liooar er ve ec Gaelgeyryn cooishyn myr shoh y resooney choud as shoh. Myr sambyl jeh red lhisagh shin resooney, ta shen y keintys jeh ennymocklyn. Roish shoh, cha nel y chooish shoh er voirey orrin monney. Agh nish t'ee çheet dy ve speeideilagh.

Brian Stowell

2008-03-22T08:15:00.000-07:00

Y vlog screeu mee roish shoh, ren ee failleil. V'ad laccal ID ennagh - cha hoig mee. Ansherbee, ec y traa t'ayn ta mee prowal reaghey reddyn son y Cohaglym Celtiagh Eddyrashoonagh hed er cummal ayns Aberystwyth ec y jerey jeh Jerrey Souree. She Phil Gawne vees loayrt son Mannin (mychione y çhymmyltaght as sustainability) as foddee dy nee ny Reeling Stones (Tom Callister as sleih aegey elley) vees ny fir-chiaullee. Y red ta mish boirit mychione: nod Mannin cummal y Cohaglym Celtiagh Eddyrashoonagh ayns Mannin sy vlein 2010?

Çhellveeish ayns Mannin

2007-09-26T12:04:00.000-07:00

Ren Brialtagh Ellan Vannin reihys beg y reaghey bentyn rish y çhirveish-çhellveeish ta Mannin geddyn. Ren ad shen kyndagh rish y naight dy vel eh liklee dy bee naightyn Border ceaut magh, as dy jig 'shirveish-naight' son Mannin voish Sostyn hiar-hwoaie. Hooar reihys y Vrialtagh magh dy by vie lesh y chooid smoo jeusyn ren votal geddyn shirveish veih Granada. Va'n earroo jeusyn ny shlee na'n earroo va laccal Mannin dy chur shirveish-çhellveeish er bun jee hene. Cha noddym gra dy vel shen cur yindys orrym. Ta Mannin ny çheer verchagh, ga dy vel y reiltys gaccan dy vel shin boght nish. Oddagh shin fordrail shirveish-çhellveeish Vanninagh veagh livrey naightyn nyn lomarcan. Dy beagh moyrn erbee ry gheddyn ayns sleih ayns shoh, veagh ad guee dy beagh shirveish-çhellveeish Vanninagh currit er bun - son naightyn er y chooid sloo. Cha nodmayd jerkal dy bee anaase ec sleih-çhellveeish ayns Newcastle ny boayl ennagh er livrey shirveish-naight yindyssagh da Mannin!
As ta Manninee ennagh foast jerkal dy vow ad tooilley naightyn Manninagh veih çhellveeish BBC ayns Manchuin. Jarrood eh! Ta aignaghyn y sleih shen ayns Manchuin festit ayns Manchuin - as cha nyrrys. Tra va mee cummal ayns Merseyside, va sleih ayns shen kinjagh gaccan nagh row monney naightyn ry akin veih Manchuin nagh row dellal rish Manchuin. Agh my ta shirveish-çhellveeish soit ayns balley mooar ennagh, t'eh doillee agglagh gyn y ve cur magh naightyn mychione y valley shen car y traa. Son shickyrys, kyndagh rish Manninee gaccan mychione shirveish y BBC da Mannin, ta lught y BBC ayns Manchuin (as buill elley) er phrowal dy haraghey yn çhirveish shen. Paart jeh ny oyryn dy ve gaccan, cha bee ad ayn roish tammylt. Agh s'doillee credjal dy bee tooilley naightyn mychione Mannin ry akin er y çhellveeish veih BBC Manchuin - nane jeh ny reddyn ta sleih gaccan mychione feer vennick ayns Mannin. S'feer dy vel y BBC er nyannoo nyn gooid share dy chur stoo mychione Mannin (goaill stiagh y Ghaelg) er yn ynnyd-eggey oc. Agh foddym credjal nagh vel monney sleih ta gaccan mysh genney naightyn Manniangh, nagh vel ad jeeaghyn er ynnydyn-eggey. Ta shin laccal shirveish-çhellveeish Vanninagh, my ta!

Fy yerrey! 20.05.07

2007-05-21T05:16:00.000-07:00

Ta mish kinjagh jarrood dy vel blog aym, as tra phrow mee dy screeu tooilley stoo bunnys 4 mee er dy henney, cha dod mee cosney stiagh blog y screeu. Ta mee smooinaghtyn dy vel eh scanshoil dy vel bloggyn Gaelgagh ayn - ta feme ain er foddey ny smoo jeu. Shione dou dy vel eh ny chliaghtey Mannin dyn y ve soilshaghey ny ta shin smooinaghtyn rish y teihill, agh cha nodmayd cooney lesh y Ghaelg er yn aght shen. Ta'n Ghaelg ayns feme jeh soilsheydys, soilsheydys,soilsheydys. V'eh anaasagh dy dooyrt Gaelgeyr ennagh 'Peiagh trimshagh elley, myr shen!' tra dimraa Gaelgeyr elley dy row blog echey. Foddym toiggal yn aght ta sleih smooinaghtyn myr shen, agh shegin dooinyn, ny Gaelgeyryn, brishey magh ass y ghetto cho mennick as oddys mayd.
Gowee kegeesh y TT toshiaght Jesarn. Eisht, bee eh keead blein dy eash. Son shickyrys, ta'n seihll er ny chaghlaa dy mooar neayr's 1907. Cha nel Mannin cosney argid mooar nish liorish turrysid. Cha nel monney lhiabbaghyn ry gheddyn nish son turrysee as cha nod oo croghey er ny baatyn - jees oc, foddee. Jesarn shoh chaie, va kayt-marrey kiarail shiaulley veih Lerpoyll gys Doolish syn astyr. Mastey troailtee elley, haink barrose lane dy phenshyneyryn gys y Pierhead ec Lerpoyll. Hooar immanagh y varroose kiedyn-boayrdal ny penshyneyryn as v'ad jerkal goll er boayrd y kayt-marrey. Cre'n jerkalys! Kyndagh rish 'doilleeidyn çhaghnyssagh' cha dod y kayt-marrey goll. Begin da ny penshynyeryn boghtey as troailtee elley fuirraghtyn rish orryn as ooryn. Fy yerrey hoal wass, daag y kayt-marrey as hiauill eh dy moal gys Doolish. Raink eh Doolish mysh jees ayns y voghrey. Haink eh magh dy row nane jeh ny kiare jeshaghtyn ec y vaatey er vailleil. Nagh mennick ta shin er chlashtyn y skeeal shen. As nagh mennick nagh vod kayt-marrey shiaulley kyndagh rish keayn garroo. C'red elley oddagh oo jerkal rish lurg da colught quaagh syn Austrail v'er chionnaghey yn Paggad Bree? Lhig dooin treishteil nagh bee brockyn mooarey jeant ec traa yn TT.

Shirveishyn Lughtyn-thie Manninagh: 03.02.07

2007-02-03T08:35:00.000-08:00

Roish yn ard-reihys Mee Houney, shimmey politickeyr va loayrt mychione 'reiltys foshlit'. Nish, ta'n Reiltys er votal dy reayll follit y coardail va jeant lesh Shirveishyn Lughtyn-thie Manninagh. 'Reiltys foshlit', dy jarroo! Lhisagh shin moylley Allan Bell, y Shirveishagh Tashtee, son votal dy lhisagh fys ennagh ve currit magh mychione y coardail shoh. Phrow Brenda Cannell e cooid share, agh cha row Coonceil ny Shirveishee eer arryltagh dy chur magh quoid argid hooar Shirveishyn Lughtyn-thie Manninagh.
Lhisagh Reiltys Vannin stiurey kiarail son paitchyn ayns gaue, as cha nee colughtyn preevaadjagh. Ta Shirveishagh Lughtyn-thie Manninagh er hoilshaghey da'n teihll nagh dod ad livrey kiarail chiart. Shimmey skeeal agglagh ta goll mygeayrt mychione y colught shoh. Foddee nagh vel firrinys erbee ayns ny skeealyn shoh, agh lhisagh fys ve ec theay Vannin er ny reddyn va goll er as ta foast goll er. Er y chooid sloo, hooar Rheynn Slaynt as Shickyrys y Theay rey rish y cholught neuchummeydagh shoh, as s'mie shen, dy jarroo.
Bentyn rish jeeaghyn mysh paitchyn t'ayns gaue, t'eh jeeaghyn dy vel Reiltys Vannin currit da cur ram argid da colughtyn preevaadjagh son livrey drogh hirveishyn.
Ta Mannin braew aighoil nagh dug ym-ysseraght Hostyn monney geill da cooishyn myr shoh ayns Mannin. Er y gherrid, haink dunverys er daa phaitchey v'ayns kiarail, as va fer ny ghaa elley feddynit marroo. Cha nodmayd gra 'Co-phobble ta Kiarail' rish shen.

Podcastyn as stoo elley: 14.12.06

2006-12-14T07:57:00.000-08:00

T'eh jeeaghyn dy vel y çhaghnoaylleeaght çheet dy ve ny smoo as ny smoo cooie da mynçhengaghyn. Dy jig y laa tra nagh bee orrin croghey er sleih elley son creeley Gaelg er y radio as er y çhellveeish. Hannah, fodmayd jannoo recortyssyn-sheean dooin hene, as jannoo mynjyskyn dooin hene - as nish, podcastyn, lesh sheean as jallooyn-gleashee. Moyll-jee yn Çhiarn!
Ta mish hene son prowal dy ynsaghey Gaelg da sleih elley er y çhellvane. Hooar mee Skype er y gherrid as t'eh gobbraghey mie dy liooar - agh ta mish foast gynsaghey yn aght dy yannoo ymmyd jeh. Ta treisht aym nagh jean m'inneen saa geid Skype voym tra hig ee dy valley veih'n ollooscoill. Agh oddagh ish jeelaadey Skype gys y ghlioonag eck hene gyn boirey.
Son shickyrys, son y chooid smoo, she sleih aeg vees jannoo ymmyd jeh'n çhaghnoaylleeaght noa - Skype, bloggyn, podcastyn, as myr shen. Gyn ourys, nee shenn sleih ennagh ymmyd jeh cullee noa - jeeagh orroosyn ta kionnaghey stoo er yn eddyrvoggyl. Agh bentyn rish ynsaghey çhengaghyn, foddee nagh bee shenn sleih ro arryltagh dy gholl stiagh sy Teihll Noa dy bollagh. Ren shin feeshan ny ghaa cour ocsyn gynsaghey Gaelg, agh er lhiam nagh vel monney sleih jannoo ymmyd jeh ny feeshanyn.

Preevaadjaghey 30.10.06

2006-10-30T08:00:00.000-08:00

Ren 'Skimmee Neuchrogheydagh' scrutaghey strughtoor Reiltys Vannin er y gherrid ad hug ad magh tuarastyl. Verragh eh er y chayt garaghtee dy ghra 'neuchrogheydagh' rish y skimmee shoh. Eear-chleragh jeh Tinvaal, daa pheiagh-dellal veih Sostyn ta currit da'n ghorley-reiree (managerialism) - nane jeu ny oltey jeh UKIP - eear-oltey ny ghaa jeh Tinvaal (ren nane jeu prowal creck Radio Vannin da fer-dellal as ghow eh yindys tra ren y theay gaccan my e chione). 'Neuchrogheydagh'?
Cha nel mish gra nagh vel strughtoor Reiltys Vannin ayns feme jeh scrutaghey, agh cha nel mee smooinaghtyn dy jed doilleeidyn goll er feaysley liorish preevaadjaghey (ny far-phreevaadjaghey) dy chooilley nhee, myr ta'n 'skimmee neuchrogheydagh' shoh coyrlaghey. Yee, saue shin!
She Benainshtyr Thooder ren cur preevaadjaghey fo raad ayns Sostyn as shimmey çheer elley t'er nyannoo arrish urree neayr's y traa shen. Cha nel monney sleih ayns Sostyn t'ayns foayr jeh preevaadjaghey shirveishyn theayagh nish. Ta ny raaidyn-yiarn ayns stayd agglagh agh ta sleih quaagh foast cosney millioonyn dy phunt veih eeckeyderyn-keesh. As ta colughtyn-ushtey gra nagh vel eh feeu dy charraghey faarnyn ayns piobyn-ushtey: veagh eh ro chostal! T'eh jeeaghyn dy vel reiltys Hostyn geearree preevaadjaghey ymmodee reddyn elley - y çhirvesh-slaynt, ny pryssoonyn, yn oik postagh... S'cummey jean preevaadjaghey livrey shirveishyn share, shoh yn eie-oaylleeaght fassanagh feiy ny cruinney nish. S'cummey dy vel delleyderyn molteyragh geid billioonyn dy phunt veih'n theay - er oi lhien!
Veagh eh ommidjagh erskyn towse dy jinnagh Mannin jannoo arrish er shoh kyndagh rish fassan. Lhisagh Manninee streeu noi eab erbee dy phreevaadjaghey shirveishyn lectraghys as ushtey, yn oik postagh, ny barrooseyn as stoo elley. Mastey reddyn elley, hug y 'Skimmee Neuchrogheydagh' roish dy lowal da colughtyn preevaadjagh stiurey Yn Ynnyd Spoyrt Ashoonagh as y Villa Marina/Gaiety. Nar lhig eh Jee. Reesht as reesht ta Reiltys Vannin goaill ayrn sy skeeal braew shen, 'Eaddagh yn Impir'. She yn Impir Mannin, lhiggey da roosteyryn geid argid voee.
Choard mee rish y skimmee tra dooyrt ad dy lhisagh Tinvaal dellal rish cooishyn ashoonagh, cha nee cooishyn ynnydagh. As choard mee roo tra dooyrt ad dy vel feme er slattys cour seyrsnys-fysseree. My vees y lheid ain dy bragh, shegin da Manninee shickyraghey dy bee seyrsnys-fysseree kiart ry gheddyn ayns Mannin. Va bree currit da slattys cour seyrsnys-fysseree er y gherrid ayns Sostyn. Hannah, ta reiltys Hostyn shickyraghey nagh bee seyrsnys-fysseree ry gheddyn. Cre'n spotçh.

Tuarastyl y thie-lheihys 18.09.06

2006-09-18T05:48:00.000-07:00

Rish kegeesh, va mee cur Gaelg er tuarastyl mychione Thie-lheihys Noble. Goll rish y Rheynn Ynsee cur cuirrey da Ofsted dy heet gys Mannin as gra reddyn bolvaneagh mychione ny scoillyn as ynseyderyn ain, hug sleih ennagh ayns Reiltys Vannin cuirrey da'n Oaseirys Kiarail-slaynt (Healthcare Commission) sy Reeriaght Unnaneysit dy heet stiagh as scrutaghey Thie-lheihys Noble. Gyn ourys, cha nel dy chooilley nhee yindyssagh sy Thie-lheihys shen, agh cha nel eh ny red mie dy chur cuirrey da sleih voish Sostyn dy scrutaghey thie-lheihys ayns Mannin tra ta'n çhirveish-slaynt ayns y Reeriaght Unnaneysit goll er preevaadjey ny veggan as ny veggan - er nonney ny smoo tappee na shen. Ayns reiltys Hostyn nish, cha nel ad smooinaghtyn er red erbee agh argid as reireydys. Ta mantra mooar ocsyn - 'Ta gagh fout kyndagh rish y reireydys'. Cha nel genney argid cheet stiagh sy chooish. My ta red erbee goll ersooyl cam, cur tooilley reiree stiagh.
Booise da Bernard Moffatt, va sleih ennagh shirrey Gaelg dy ve currit er y tuarastyl screeu yn Oaseirys Kiarail-slaynt mychione y scrutaght va jeant oc er y gherrid er Thie-lheihys Noble. Cha vaik mee rieau tuarastyl va screeut er aght cho moal as y fer shoh. T'eh fud y cheilley, doillee agglagh dy hoiggal (ta mee çheet er y Vaarle agglagh), as ta gagh red screeut mysh 3 keayrtyn. Ta 23,000 fockle sy tuarastyl. Oddagh oo geddyn y bun jeh lesh 1,000 fockle. Reireydys, Reireydys, Reireydys - car y traa. Ny foddee dy vel eh Fysseree, Fysseree, Fysseree. Ta'n Oaseirys Kiarail-slaynt shirrey er skimmee Thie-lheihys Noble ad dy haglym fysseree feiy'n laa as fud ny h-oie, dy yannoo polaseeyn ass towse, as eisht dy yannoo plannyn-obbree ass towse, as eisht dy haglym ooilley jeu shen stiagh ayns un phlan ooilley-ghoaillagh as yindyssagh. Eisht shegin lhiantyn rish y phlan shen - cha lhisagh y thie-lheihys jannoo red erbee 'reactive' maghey shen. T'ad gra managerialism rish.

Y Vritaan: 12.08.06

2006-08-12T09:23:00.000-07:00

Hie mish as my ven gys y Cohaglym Celtiagh ayns Karaez (Carhaix) sy Vritaan bunnys kegeesh er dy henney. Va shin ayns shen woish Jelune 31.07.06 gys y Doonaght lurg shen as v'eh feer vie. Marish sleih elley, hannah shin ayns scoill ard Diwan - scoill raad t'ad gynsaghey trooid Britaanish. Kyndagh rish y vunraght Rangagh (as noidys reiltys Paris) cha nod ny Britaanee geddyn cooney argidoil son ny scoillyn Diwan, er lhimmey jeh faillyn ny ynseyderyn. Cha nod ad ad geddyn argid-steat son troggalyn, lioaryn, a.m.s. Agh t'ad er nyannoo dy mie mirrilagh dy chur scoillyn Diwan er bun sy Vritaan - bunscoillyn as scoillyn ardey. Dy firrinagh, cha nel y chengey Vritaanagh jannoo ro vie - as cha nyrrys. Cha nel y steat Frangagh coontey monney jeh chengey erbee agh Frangish. As shimmey Frangagh ta goaill aggle vooar roish Baarle.
Cha nel eh feer foddey er dy henney dy row millioon dy loayrtee dooghyssagh dy Vritaanish ayn. Ta'n earroo shen foddey ny sloo nish, as ta'n chooid smoo jeusyn shenn. Agh cha nel y chooish caillt noadyr. Ta kuse dy veeillaghey dy leih aegey goll er ynsaghey trooid Britaanish, as ta ny Britaanee cur magh lioaryn as earishlioaryn stoamey ayns Britaanish. Ta cowraghyn daahengagh ry akin nish mygeayrt y Vritaan - cha row y lheid lowit gys paart dy vleeantyn er dy henney! Ta bree dy liooar ayn.
Bun-chooish y Chohaglym Celtiagh mleeaney, va shen 'y Celtiaghys ayns ellyn' (jallooyn, sthowranyn as nyn lheid). Loayr un pheiagh voish gagh çheer mychione y chooish shoh. Smooinee paart jeh ny shey loayrtee dy daink y 'Celtiaghys' veih'n çheer as y keayn. Heill y chooid elley dy daink y Celtiaghys veih'n stoo grainnit er ny shenn chlaghyn as yn ellyn ayns ny shenn lioaryn crauee. Dooyrt ny loayrtee Britaanagh as Bretnagh dy vel ny ellyneyryn feer scanshoil bentyn rish y pholitickaght - red nagh vel sleih ennagh toiggal ayns ny ellanyn shoh.
Ghow Emma y Christeen arrane ayns Gaelg sy chuirrey-kiaullee mooar ayns Karaez as ish cloie yn chruitçh. V'ee mie arbaghtal.

Aghinyn: 18 Jerrey Souree 2006

2006-07-17T13:23:00.000-07:00

T'eh jeeaghyn dy vel yn Ard-shirveishagh Donald Gelling gaccan mychione yn earroo dy leih ren cur roish aghinyn Laa Tinvaal mleeaney. Lhisagh eh ve gaccan mychione ny oyryn ta wheesh dy leih cur roish aghinyn. Foddee dy vel paart jeh ny aghinyn beggan ommidjagh. Agh, gyn ourys erbee, cha nel ram jeu ny aghinyn ommidjagh. Ta ny aghinyn shoh currit roish ec sleih t'er phrowal dy chooilley nhee dy gheddyn cairys - ny quaiylyn as Tinvaal, foddee.
Shegin dhyt ve debejagh dy chur aghin roish my ta cooish hrome ayd. T'eh jeeaghyn dy vel eh goll rish cronghyr my t'ou shirrey cairys liorish aghin Laa Tinvaal. Shegin dhyt fuirraghtyn derrey veese anaase dy liooar ec oltey ennagh jeh'n Chiare as Feed er yn aghin ayd. Eisht, foddee dy bee er yn oltey shen (my vees y lheid ayn) prowal dy chur bing reiht (select committee) er bun. As s'cosoylagh nagh bee veg taghyrt lurg ooilliu.
She reiltys Vannin ta loghtagh. Ta Tinvaal goll rish club dy leih ta smooinaghtyn mychione oc hene car y traa. Ta'n chooid smoo lane shickyr dy vel ad jannoo obbyr vie. Agh, son y chooid smoo, cha nel ad abyl y theay y hoiggal.

BNP ayns Mannin: 29.06.06

2006-06-29T08:19:00.000-07:00

Bunnys shiaghtin er dy henney, haink sleih veih'n Phartee Ashoonagh Goaldagh dys Mannin. Dooyrt yn fer-toshee (!) oc, Nick Grifin, dy vel ad geearree cur y partee er bun ayns Mannin. T'ad laccal shirreyderyn dy ghoaill ayrn ayns ard-reihys Vannin ayns Mee Houney. T'eh jeeaghyn nagh vel ad er n'eddyn peiagh erbee choud as shoh ta arryltagh shen y yannoo. Ta mee treishteil dy jeean nagh vow ad peiagh erbee. Cha nel Mannin sy Vretyn Vooar - as, ga dy vel y lipaid shen orrym er egin, cha nel mish Goaldagh. She Manninagh mish.
Cha nel ny cretooryn shoh veih'n BNP jannoo red erbee ag greinnaghey feoh noi sleih ta doo, dhone ny bwee.

Craueeaght as comyssey: 13.06.06

2006-06-14T12:10:00.000-07:00

Va'n Shirveishagh Slaynt, Steve Rodan, gobbal jiu dy row doilleeid erbee ayn bentyn rish cur condomyn ayns scoillyn-ard Vannin. Dy firrinagh, cha dooyrt eh shen dy jeeragh. Tammylt beg er dy henney, va skeeal ayn dy dooyrt Mnr Anderson, y Shirveishagh Ynsee, dy row eshyn noi cur greieyn-condom ayns scoillyn-ard Vannin da ynseydee sy cheyoo vrastyl. T'eh jeeaghyn dy dooyrt eh shen kyndagh rish e chredjue. Ta sleih credjal dy vel Mnr Anderson currit da'n chraueeaght echey dy lajer.
Eisht, dooyrt Peter Karran, oltey jeh'n Chiare as Feed son Kione Droghad, dy row credjue Vnr Anderson lhiettal yn obbyr echey myr Shirveishagh Ynsee - lhisagh eh cummal sy 'teihll firrinagh'. Kyndagh rish shen, dooyrt Steve Rodan nagh row resoonaght erbee mychione y chooish shoh er ve ayn eddyr y daa rheynn-reiltys, y Rheynn Slaynt as y Rheynn Ynsee.
S'doillee dooys credjal nagh vel craueeaght Vnr Anderson lhiettal yn obbyr echey myr Shirveishagh Ynsee. Roish shoh, t'eh er ghra reddyn feer whaagh mychione homocheintee. T'eh jeeaghyn dooys dy vel credjue feer undinagh ec y fer shoh. Lhisagh eh tannaghtyn myr y Shirveishagh Ynsee?

Paitçhyn treih: 21 Boaldyn 2006

2006-05-21T01:19:00.000-07:00

T'eh jeeaghyn nagh vel Reiltys Vannin kiarail geddyn rey rish colughtyn preevaadjagh ta stiurey shirveishyn-kiarail son paitçhyn. Lhisagh lheid ny shirveishyn shen fo smaght y reiltys dy bollagh. Cha nod oo croghey er colughtyn preevaadjagh - cha nee dellal t'ayn goll rish creck stoo ayns shapp. Shoh yn eie-oaylleeaght (ideology) ta fassanagh feiy ny cruinney nish: 'theayagh -olk: preevaadjagh - mie'. Ayns Sostyn, ta Blair braew jeean dy phreevaadjaghey yn shirveishyn-slaynt as ny scoillyn - as stoo elley. Jeeagh er y stayd ommidjagh as treih jeh ny traenyn hoal!
Kyndagh rish reddyn grait ec y Çhirveishagh Slaynt as ec yn Ard-shirveishagh, cha nodmayd jerkal dy bee ad cur geill kiart da moyllaghyn y tuarastyl haink ass y vrialtys mychione sleih aegey ayns kiarail. T'eh jeeaghyn dy vel y reiltys foast soit er cur argid da colughtyn preevaadjagh neu-fondagh.

Podcastyn Gaelgagh? 4 Mee Boaldyn 2006

2006-05-04T07:43:00.000-07:00

Lhaih mee jiu sy phabyr-naight Sostnagh y Guardian mychione Divlynnagh enmyssit Ken Carroll t'er chur er bun shirveish-podcast (Chinesepod.com) ry hoi ynsaghey Sheenish da sleih. By vie lesh shirveish y chur er bun ry hoi ynsaghey Baarle da Sheenee, agh ec y traa t'ayn cha nhione da Sheenee dy liooar yn aght dy roshtyn lheid y çhirveish. Ta Chinesepod.cast nane jeh ny queig ynnydyn-podcast syrjey sy teihll nish.
Ta Ken Carroll er ve gynsaghey Baarle myr çhengey yoarree da sleih son ny shlee na feed blein nish. Hie eh trooid yn Oarpey, eisht hie eh gys Shanghai ayns 1994. Hug eh scoill-çhengey er bun ayns shen. Nish, ta queig banglaneyn ec y scoill lesh ny shlee na keead ynseyder as 2,500 studeyr. Hooar Ken Carroll magh mychione podcastyn ayns 2005 as hoig eh dy beagh ad cooie da ynsaghey çhengaghyn. Cha nel oo laccal agh un ynseyder dy roshtyn keeadyn dy veeillaghyn dy studeyryn as cha nel ny costyssyn mooar. Nish ta Ken as e cho-obbreeyn cur magh coorseyn ayns Mandarin liorish podcastyn. Ta Ollooscoill Qinghua ayns Beijing er chur cuirrey da Ken d'obbraghey maroo.
Ta'n argid mooar ry chosney liorish ynsaghey Baarle da Sheenee. Ta'n reiltys Sheenagh gra dy vel ad ayns feme jeh millioon ynseyder. Cha nel yn earroo shen ry gheddyn, agh t'ad loayrt mychione saaseyn tradishoonagh. Lesh ynsaghey-podcast, veagh ad laccal foddey ny sloo na millioon ynseyder. As, gyn ourys, bee Ken ayn dy chooney lhieu.
Surrys enn dy vel eh braew feeu dy smooinaghtyn er ynsaghey Gaelg liorish podcastyn.

Shirveishyn-killagh ayns Gaelg: 16 Averil 2006

2006-04-16T05:18:00.000-07:00

Son tammylt nish, cha nel shirveish-chillagh ayns Gaelg er ny cummal, kyndagh rish y çhingys jeh'n pheiagh ta cliaghtey reaghey ny shirveishyn. Dy cliaghtagh, va kiare shirveishyn goll er cummal gagh blein. As, er y gherrid, hie gagh nane jeh ny shirveishyn Gaelgagh er cummal ayns kialteenyn ec Agglish Hostyn.
Cha nel mee my pheiagh crauee, ga dy vel mee smooinaghtyn dy voddym toiggal cre'n fa ta sleih ennagh currit da craueeaghtyn. She red sheshoil as cultooroil t'ayn, as my oddys oo credjal dy bee bioys ayn lurg baase, ta shen dy dty gherjaghey. Yn ynrican resoon ta mish pohlldal ny shirveishyn Gaelgagh, shen y Ghaelg hene. Ga nagh mie lhiam dy nee Agglish Hostyn ren eh, she yn agglish shen ren cooney lesh çhengey ny mayrey. Chroo Agglish Hostyn tradishoon Gaelgagh liauyr ayns Mannin as veagh eh treih dy beagh y tradishoon shen çheet gys jerrey.
Nurree, tra vrie peiagh ennagh cre'n fa nagh row shirveishyn Gaelgagh goll er cummal, hug mee faaue dy lhisagh shin reaghey shirveishyn ayns agglish elley - yn Agglish Haasilagh, myr sampleyr. Agh cha row yn peiagh shen jeant booiagh lesh shen er chor erbee! Ta enney aym er shirveishagh Saasilagh as Gaelg dy liooar echey, agh t'eh ro harroogh dy reaghey shirveish Ghaelgagh ec y traa t'ayn. Tra vees eh ny haaue, foddee. Shegin dooin smooinaghtyn reesht.

4 Averil 2006 Geddyn rey rish kiedyn-obbyr?

2006-04-04T09:22:00.000-07:00

Ta treealtys ayn dy gheddyn rey rish kiedyn-obbyr son ynseyderyn as boandyryn ta shirrey obbyr ayns Mannin. Shoh dy jeeragh ny kiartaghyn ta Manninee shirrey - cha nel dy chooilley pheiagh shirrey obbyr sy cherroo-argidys. T'eh quaagh dy liooar dy dooar y Stiureyder-ynsee yn kiartey echey kyndagh rish ny reillyn mychione kiedyn-obbyr. V'ad er chee pointeil ben veih Sostyn dy ve ny Stiureyder-ynsee ayns Mannin, agh ren John Cain as sleih elley musthaa as hooar eshyn y kiartey. Foddee nagh vel ad kiarail geddyn rey rish kiedyn-obbyr son sleih feer ard!
Ta tradishoon lajer ec Reiltys Vannin - soiaghey beg jeh Manninee ta laccal cheet dy valley erreish daue v'er ve eginit faagail Mannin dy gheddyn obbyr. Gyn ourys, neemayd clashtyn blaatar mychione 'Ta shin shirrey yn peiagh share son y startey'. Ro vennick, ta shen coad son 'Cha nel shin laccal Manninagh'. Reillyn son quaaltyssyn (interviews), er lhiam nagh vel ad lowal da'n sleih ta stiurey yn quaaltys dy vriaght feyshtyn goll rish 'Vel dty ven/ghooinney/phaitchyn laccal cheet dys Mannin?' Mennick dy liooar ta peiagh ennagh er ny phointeil gys kiartey ayns Mannin as t'ad cheet gys shoh marish ben ny dooinney ny paitchyn nagh vel booiagh dy ve ayns Mannin. Feer vennick, ta sleih cooie ayns Mannin (paart jeu jannoo yn obbyr hannah) lhisagh goll er pointeil syn ynnyd jeh jummal argid as traa pointeil sleih vees faagail Mannin lurg blein ny ghaa - paart jeu cheet dys shoh dy chosney MA ny yn lheid lesh cooney mooar veih Reilys Vannin.
Ta skeealyn dy liooar ayn mychione Manninee hoal ayns Sostyn ta geearree cheet dy valley d'obbraghey as cummal ayns Mannin. Ta drogh ourys ayns nagh vel ad geddyn cooney shen y yannoo er y fa dy vel ad nyn Manninee. Foddee dy row marran jeant aysn 1991 tra hooar mish cooney dy heet dy valley!

Joarreeyn ayns Mannin 25 Mayrnt 2006

2006-03-25T04:45:00.000-08:00

Ayns Tinvaal, dooyrt Peddyr Karan dy vel scoltaghyn sheshoil çheet rish ayns Mannin kyndagh rish sleih ayns shoh goaill ro-foays ass joarreeyn ta çheet gys Mannin dy gheddyn obbyr. Er lhiam dy ren yn Ard-shirveishagh as peiagh ny ghaa elley freggyrt y feysht aggairagh tra loayr ad mychione fir-lhee çheet gys Mannin d'obbraghey ayns shoh. Strooys hene nagh row Peddyr Karran çheet er fir-lhee joarree, agh er joarreeyn boghtey ta eginit gobbraghey son faill injil. Foddee va Mainshtyr Karran çheet er sleih nagh vel monney jin fakin, sleih ta gobbraghey son colught ta glenney offishyn. Cre'n sorçh dy vea t'ocsyn? Vel ad goaill soylley jeh berçhys Vannin?

As cre mysh ny boandyryn Philippeenagh? My ta babbanyn ruggit daue ayns Mannin, vel ny ruggyryn recortit myr ruggyryn Manninagh? Ta skeeal goll mygeayrt nagh vel. C'red ta goll er? As vel ny eginit tannaghtyn ayns Mannin? Foddee nagh vowmayd magh derrey vees scammylt ennagh çheet rish

Lunney ny lioaryn shen

2006-03-16T03:08:00.000-08:00

16 Mayrnt 2006
Hie reddyn feer vie ec y Vunscoill bentyn rish lunney ny lioaryn Jeheiney shoh chaie. Haink Joe Saunders, e vraar Terence, e huyr Eileen, e vac Cathal, e voir, Don as mac-vraarey/shayrey - sleih dy liooar! Hannee ad ayns thie-oast er shooylaghan Ghoolish. Hooar as gleashtan mooar er mayl as haink ad gys y Vunscoill jeeragh rosih 2.45 pm. Va fotografee veih pabyryn-naight Vannin er ve lacal goaill caslyssyn as eisht ersooyl lesh, agh hannee eh son y clane immeeaght. Kyndagh rish y reill quaagh veih'n Rheynn Ynsee, cha ghow eh caslyssyn erbee jeh ny paitchyn.
Dinsh shin da ny paitchyn ny va goll er. Va Paayl Rogers as Julie Matthews er reaghey dy jinnagh ny paitchyn goaill arrane as lhaih magh daanyn mychione y Nah Chaggey Mooar - paart jeh'n studeyrys oc as yindys mooar dooys as da sleih elley. Loayr Joe (mac y dooinney ren screeu 'Reks Carlo ayns Mannin' ayns Yernish) ayns Yernish as Baarle, as hug eh da ny Manninee gioot braew - jalloo jeh screeudeyrys Ogham. Hug eh lioaryn Yernish da'n scoill neesht.
Hug mish coip jeh 'Reks Carlo ayns Mannin' da ny Yernee as va coip jeh 'Dunveryssyn yn Tooder-Folley' ry gheddyn myrgeddin. Hannee ny Yernee oieghyn Jeheiney as Jesarn ayns Mannin. V'ad coontey ram jeh'n turrys - er lhimmey jeh'n doilleeid jeh geddyn lhongey ayns thie-bee ayns Mannin er yn oie!

Lunney lioaryn noa

2006-03-08T08:49:00.000-08:00

Jeheiney, 10 Mee Vayrnt, hig Joe Saunders (mac Chathail Uí Shandair) veih Nerin marish sleih dy liooar sy lught-thie echey. T'ad çheet son lunney 'Reks Carlo ayns Mannin', lioar hug mee Gaelg er veih'n Yernish 'Reics Carló inOileán Mhanann', screeut ec Cathal Ó Sandair. Ec yn un cheayrt, neemayd lunney yn oorskeeal screeu mee, 'Dunveryssyn y Tooder-folley'.

Hed y lunney er cummal sy Vunscoill Ghaelgagh ayns Balley Keeill Eoin. Hug mee cuirrey da Pabyryn-naight Vannin dy chur peiagh ennagh dy ghoaill caslyssyn ec y taghyrt shoh. Hooar mee fys vouesyn nagh vel ad lowit dy ghoaill caslyssyn jeh paitçhyn sy scoill kyndagh rish oardagh keoi ennagh hooar ad veih'n Rheynn Ynsee! T'eh jeeaghyn dy dooar y Rheynn Ynsee 'linnaghyn-stiuree' ennagh veih'n Reeriaght Unnaneysit as ta'n Rheynn er chur magh oardagh ta foddey ny smoo keoi na'n stoo veih'n RU. Agh cha jeanmayd lhiggey boghtynid myr shoh milley immeeaght vaynrey.

Lunney lioaryn noa

2006-02-27T06:56:00.000-08:00

27 Toshiaght Arree 2006

Ec 2.45 pm Jeheiney 10 Mayrnt, hed daa lioar Gaelgagh noa er lunney ec y Vunscoill ayns Balley Keeill Eoin. She 'Dunveryssyn y Tooder-folley' as 'Reks Carlo ayns Mannin' ny lioaryn. She 'Dunveryssyn y Tooder-folley' y chied oorskeeal (novel) Gaelgagh va rieau screeut as currit magh. T'eh mychione reddyn scammyltagh ayns Mannin ec y traa t'ayn. Ta treisht aym dy jean Gaelgeyryn goaill soylley jeh.
S'cooin lhiam dy mie ny lioaryn ayns Yernish va screeut ec Cathal Ó Sandair bleeantyn er dy henney tra va mish goaill toshiaght Yernish 'ynsaghey. Va ny lioaryn screeut son jeigeyryn. Va shoh cho foddey er dy henney as dy row ad jeant ayns y chlou Gaelagh. Mastey ny lioaryn shoh, va strane mychione cronneyder Divlynnagh enmyssit Reics Carló, ny Reks Carlo lesh aght-screeuee Manninagh. Va nane jeh ny lioaryn shoh enmyssit 'Reics Carló in Oileán Mhanann' ('Reks Carlo ayns Mannin'). Ren Cathal cur hym eh, as eh shirrey orrym mish dy chur Gaelg er. Cha row caa aym shen y yannoo ec y traa v'ayn. Hooar Cathal baase jeih bleeaney er dy henney. Fy yerrey, hug mee Gaelg er y skeeal ny veggan as ny veggan - hie eh er clou sy Manninagh Seyr, shiaghtin lurg shiaghtin, blein ny ghaa er dy henney.
Tra hooar Leslie Quirk baase, hooar mee magh dy row eshyn er ve screeu gys Cathal Ó Sandair as gys mac Chathail, Joe Saunders. Va Joe feer wooiagh dy chlashtyn dy row mee er chur Gaelg er skeeal y jishag echey as dy row lioar jeant. As tra cheayll Joe dy lunnagh shin y lioar, v'eh braew jeean dy heet gys y lunney - marish shiaght ny hoght jeh'n lught-thie echey!
Ta'n Vunscoill ny voayl feer chooie da'n lunney. Nee eh soilshaghey da ny paitçhyn dy vel shin cur magh lioaryn noa ayns Gaelg. As va Leslie feer ghraihagh er çheet gys y Vunscoill dy insh skeealyn da ny paitçhyn. Ta kianglaghyn dy liooar ry gheddyn ayns shoh.

Gynsaghey dy vloggal

2006-02-24T11:05:00.000-08:00

Jeheiney 24 Toshiaght Arree

Shoh mish, gynsaghey dy vloggal. Cha dod mee cosney stiagh gys y vlog ren mee yn laa elley, er y fa nagh dug y coarys enney er m'ockle-arrey (password) - as hug mee yn ennym-ymmydeyr aggairagh neeshy! Cha nyrrys dy row boirey ayn. Chossyn mee stiagh fy yerrey. Nish, shegin dou ynsaghey yn aght dy yannoo kianglaghyn.

BlogVrian

2006-02-20T05:40:00.001-08:00

Ta mee croo yn vlog shoh, Jelune 20 Toshiaght Arree 2006.

AUNDYR SON RADIO VANNIN
Cheayll mee yn çhiaghtin shoh chaie dy bee Radio Vannin cosney aundyr son y stashoon-radio share ayns "SOSTYN HEEAR-HWOAIE"! As shoh 'Stashoon yn Ashoon'. T'eh jeeaghyn nagh vel reirey Radio Vannin slane shickyr cre'n ashoon t'ad ayn. Ta mee credjal dy bee Radio Vannin goaill ayrn ayns co-hirraghyn elley ayns Sostyn. Ta mee toiggal cre'n fa t'ad jannoo shoh - t'ad geearree soilshaghey da cummaltee Vannin dy vod ad cosney aundyryn. Ta politickeyryn ayns Mannin nagh ren rieau coardail rish y smooinaght dy vel Mannin ayns feme jeh stashoon-radio ashoonagh. Cha nod ny politickeyryn shoh (as Manninee elley) toiggal dy noddagh stashoon-radio MANNINAGH jannoo foays mooar da Mannin as ta Radio Vannin foddey dy liooar veih 'Stashoon yn Ashoon'. As cha nel reirey Radio Vannin toiggal Mannin as ny Manninee.
Kuse dy vleeantyn er dy henney, deeck Railtys Vannin argid ass towse da fir-choyrlee voish Lunnin (!) dy insh da Mannin stoo shione da'n chayt hannah: lhisagh Radio Vannin ve ny stashoon va shirveishaghey theay Vannin - stashoon fo'n Reiltys lesh kaart (charter) goll rish y BBC. Va ram sleih ayns Mannin laccal claareyn trome-chooishagh bentyn da cooishyn Vannin chammah as kiaull-pop. Va stiureyder noa er ny phointeil. Agh daag skimmee dy liooar yn stashoon.
Ta mee guee dy bee Radio Vannin speeideilagh. Agh bee eh doillee agglagh da dy ve cosney argid - cha nee dellal t'ayn dy firrinagh. As cre'n fa t'ad gra 'toyrtys' ('subvention') rish yn argid ta'n Reiltys cur da Radio Vannin? She stashoon-steat t'ayn, ny yei. Ga nagh bee sleih ennagh boirit dy vel reirey Radio Vannin lhiggey er dy vel Mannin ayns Sostyn, bee sleih elley feer chorree dy jarroo, as bee caa elley currit da noid Radio Vannin dy hoie er reesht.

BlogVrian

2006-02-20T05:40:00.000-08:00

Ta mee croo yn vlog shoh, Jelune 20 Toshiaght Arree 2006.

Cha nel fys aym dy jeeragh cre ta mee jannoo.