BlogVrian

Monday, February 20, 2006

BlogVrian

Ta mee croo yn vlog shoh, Jelune 20 Toshiaght Arree 2006.

AUNDYR SON RADIO VANNIN
Cheayll mee yn çhiaghtin shoh chaie dy bee Radio Vannin cosney aundyr son y stashoon-radio share ayns "SOSTYN HEEAR-HWOAIE"! As shoh 'Stashoon yn Ashoon'. T'eh jeeaghyn nagh vel reirey Radio Vannin slane shickyr cre'n ashoon t'ad ayn. Ta mee credjal dy bee Radio Vannin goaill ayrn ayns co-hirraghyn elley ayns Sostyn. Ta mee toiggal cre'n fa t'ad jannoo shoh - t'ad geearree soilshaghey da cummaltee Vannin dy vod ad cosney aundyryn. Ta politickeyryn ayns Mannin nagh ren rieau coardail rish y smooinaght dy vel Mannin ayns feme jeh stashoon-radio ashoonagh. Cha nod ny politickeyryn shoh (as Manninee elley) toiggal dy noddagh stashoon-radio MANNINAGH jannoo foays mooar da Mannin as ta Radio Vannin foddey dy liooar veih 'Stashoon yn Ashoon'. As cha nel reirey Radio Vannin toiggal Mannin as ny Manninee.
Kuse dy vleeantyn er dy henney, deeck Railtys Vannin argid ass towse da fir-choyrlee voish Lunnin (!) dy insh da Mannin stoo shione da'n chayt hannah: lhisagh Radio Vannin ve ny stashoon va shirveishaghey theay Vannin - stashoon fo'n Reiltys lesh kaart (charter) goll rish y BBC. Va ram sleih ayns Mannin laccal claareyn trome-chooishagh bentyn da cooishyn Vannin chammah as kiaull-pop. Va stiureyder noa er ny phointeil. Agh daag skimmee dy liooar yn stashoon.
Ta mee guee dy bee Radio Vannin speeideilagh. Agh bee eh doillee agglagh da dy ve cosney argid - cha nee dellal t'ayn dy firrinagh. As cre'n fa t'ad gra 'toyrtys' ('subvention') rish yn argid ta'n Reiltys cur da Radio Vannin? She stashoon-steat t'ayn, ny yei. Ga nagh bee sleih ennagh boirit dy vel reirey Radio Vannin lhiggey er dy vel Mannin ayns Sostyn, bee sleih elley feer chorree dy jarroo, as bee caa elley currit da noid Radio Vannin dy hoie er reesht.

1 Comments:

At 10:41 AM, Blogger fer-toshee said...

Vel oo er clashtyn rish 'Manx at the Movies'? Cre'n sorçh dy 'stashoon yn Ashoon' ta jannoo shen?

Ansherbee, shoh ny kesmadyn podcast y yannoo:

1/ Fow Quicktime 7 Pro
2/ Sy menu, reih 'New Audio Recording'. Bee shickyr ta mic kianglit.
3/ Crig y cramman jiarg 'capture'
as y cramman doo 'stop' tra t'ou jeant.
4/ Sy file menu reih 'export'
5/ Sy chishtey fo 'export' reih 'Movie to MPEG-4
6/Cur ennym er y file lesh yn extension .m4a (dtyfile.m4a) sy chishtey-dialog "Save exported file as ...
(ta'n kesmad shoh son kiangley rish ipodyn).

Nish ta file ayd jesh dy chreeley

Nah, my t'ou goll gys 'Ourmedia' oddagh oo laadey eh seose as cur kiangle voish shen gys dty vlog.

Aigh vie!

 

Post a Comment

<< Home